ليش عندي متلازمة جوسكا؟

 

سألت نفسي هالسؤال !

و قلت ممكن أبالغ أو أنا بس أحب أقلد الأمريكان لكنها فعلاً مشكلة حقيقية أدور لها حل!

سألت chatgpt و عطانيي بعض الأسباب اللي هي صح لكن أحس الموضوع أعمق من كذا بقول لكم وش قال لي و بعدها بقول لكم رأيي أنا..

جوابه كان:

تجي متلازمة جوسكا بسبب القلق و التوتر و الشعور بالتحكم و المبالغة في التحليل و الانعزال الاجتماعي كلامه صح 100% بس وش لاحظتو العامل المشترك بين هالصفات؟ 

الحساسية!

خلوني أشرح لكم وجهة نظري

اي نعم أنا انسانة حساسة و أفهم هذا الشي الآن لكن سابقاً كنت أتعرض للعتاب و التنمر بسبب حساسيتي طبعاً قصة طويلة لكني وصلت الى مرحلة تجميد مشاعري و هالشي خلاني ما أقدر أعيش شعوري الحقيقي، خلاني أكون خجولة و بالتالي أتوتر من وجهة نظر الناس عني و أفكارهم و هل أنا جرحتهم؟ هل هذا الشخص غلط علي ولا أنا أبالغ زي ما انقال هالكلام كثييير؟ و هالشي خلاني أصير محللة بزيادة أحلل كل شي يخص الناس و أنسى نفسي لذلك أحس بمشاعر ثقيلة بكل مره أحد يقول لي تعالي اطلعي معانا و ألاحظ بدل ما ان الموضوع يخف عندي اذا خالطت الناس يزيد!!

و يزيد لدرجة مرعبة و أنا برا ومرات أتوتر أتكلم بصوت عالي أو أسوي حركة أو تعبير يدل على اني أكلم نفسي..

أسأل نفسي ليش ؟ مو أنا طلعت و شاركت الناس، هل لأن هذولا الناس مو على جوي ؟ و لا لأن المشكلة فيني؟

تراودني كثير أسئلة مالها جواب و لا لها حل!

و هذا يخليني أسأل لازم يعني حل؟

ما علينا خلونا نرجع للأسباب و نناقشها..

من ضمن الأسباب اللي قالها الشعور بالتحكم يعني انك اذا كنت فاقد السيطرة على حياتك فأنت تتخيل عشان تحس انك تملك حياتك وتتحكم بمجريات الأمور لكن النتيجة أيش؟ ان حياتك بدل ما تكون زفت تصير أزفت هههههههههههههههه

و هذا اللي يخلينا نرجع ونكرر نفس الخيال و ممكن نغير السيناريو اذا طفشنا من اللي قبله و يعطينا دفعة دوبامين لكن للأسف أيش يصير؟ ينخفض الدوبامين بشكل كبير لما تخلص من الخيال و تخليك تدخل لسخط و احباط رهيب و موجع كثير لك..

ممكن كمان لأني حساسة أو أخاف من ردة فعل الناس لذلك أخلق مساحة حوار آمنة في خيالي بدون اعتراضات بدون احراج بدون اهانة بدون ألم و أنا أدير الحوار بالكامل طبعاً الشخص الواو في الحوار هو أنا مع اني مسوية كل الشخصيات بس لازم أحطهم كومبارس عشان أكون اللي يا أرض اتهدي ما عليكي قدي ههههههههههههههه 

صح ان الحوارات مثمرة و حلوة و تفيدني و أقول شلون فكرت فيها؟ لكن المؤسف ان الناس و العالم مو كذا لازم أتقبل فكرة ان فكرتي غير مرحب فيها أو غير مقبولة من بعض البشر ليش ؟ لأن هذي سنة الحياة لازم أتقبل هذا الشي و لازم أحطه ببالي و أخليه شعاري لأن هروبي من هذولا الأشخاص اللي يعترضون علي هو اللي يخليني سنييين عالقه بهالشي ..

مخكم طار بعيد و صرتوا تتخيلون؟ ارجعوا حبايبييييي 😂

المهم خلونا نكمل ..

من ضمن الأسباب هو خوفك من المستقبل و عدم ثقتك بالله و توكلك عليه لذلك الا غصب تخلق سيناريوهات أنت فيها بأفضل حال عشان تكون كذا بينما حياتك الحالية دمار!

شلون تبي مستقبلك كويس بينما حاضرك أنت مو موجود فيه؟ كلنا نعرف ان المستقبل امتداد للحاضر و الحاضر امتداد للماضي لذلك كلها مرتبطة ببعض ..

كمان من ضمن الأسباب انك ما تعبر!

اي ما تعبر عن أفكارك لأنك تعرضت لقمع أو تأنيب ما يحتاج تقولها للي حولك ممكن تقولها بالنت أو تحكيها لنفسك زي ما أحكيها لنفسي الآن و أناقش أفكاري مع نفسي و ممكن تطلع لكم و تشوفونها بعدين..

الخلاصة

احنا عندنا متلازمة جوسكا بسبب الحساسية اللي نرفضها و اللي هي أجمل صفة فينا، بس نتقبلها و نحبها و نكون على طبيعتنا كل شيء بيتغير للأفضل، و الأهم من هذا كله وش نسوي؟ نشوف موضوع الخوف عندنا و نعالجه لأن اذا عالجناه الحياة بتكون أفضل مكان لنا و أجمل مكان و راح نبطل نعيش بمخنا بسسس 💗