المغني و الممثل جاي جونغ jaejoong

ودي أكتب عنه و السبب قصته المثيرة للاهتمام و الغرابة اللي فيها..

قصته انسانية و شاعرية وتكاد تكون ضرب من الخيال 

قصة لقائه مع اللي تبنته الصدق أثرت فيني كثير مو شوي و هالانسان حرك بداخلي الكثير مدري ليه وقفت و دقرت عند قصته ههههههههههههههههه

يمكن لأن أخواته كلهم بنات و أنا اخواتي كذا و ما عندنا اخوان و كان حلمي كذا! ما أدري 

أدري راح علينا هالموضوع لكن عندنا ولد خالتي الصغير الصدق يعطيني نفس شعور هالولد ذا 

بحكي قصته و ليش أثرت فيني !

أول شي جاي جونغ كان عايش حالة سيئة و جابته قريبة أمه اللي متبنيته حالياً وقالت لها خذيه لكن هي رفضت و قالت عندي 8 بنات شلو بربيه ذا معاهم؟ بعدين جاء و حضنها و صار يقولها ماما ماما 😭 و يمسح بخدوده على خدها وبعدها دخل بقلبها و صار ولد قلبها و صارت تقول وش يعني ترى بزيد صحن رز و ملعقة له بس ههههههههههههههه

يا زينها.. (بحط رابط اللقاء بالأخير للي يبيه)..

اللي خلاني أشوفه هو برنامج fun staurant الكوري و اللي يعرض حياته مع خواته و القصص اللي قالها، مره حبيت كيف ان النونات عسولات صدق صدق يحملون جزء كبير من حنية أمهم لدرجة ان أصغر خواته كانت ما تحتفل بعيد ميلادها عشان ما ينتبه انه بينهم 10 أشهر بس و يعرف انه متبنى وهه الله يازيين البنات بسسس💖💖💖

المهم هو لما اشتهر بالذات جاته مكالمة من أمه البيولوجية و عرف بعدها و كانت صدمة كبيرة عليه و طبعاً الأم كانت تبي الفلوس و أصلاً سبب تخليها عنه الفلوس لكن شوفوا سبحان الله شلون هالنونو كبر و صار غني و ثري عز نفسه و اللي حوله بتوفيق الله..

طبعاً هو قبلها كان يحاول يغني و ما كان صوته حلو لكن طوره و حاول حتى نجح و دخل وكاله مين اللي دفع له؟

خواته هم اللي ساعدوه و اهتموا فيه و دفعوا له السكن و أجرة الباص ووحده من خواته سكنته معاها..

ممممم ممكن كمان جزء من تعلقي بقصته اني أشوف فيها العوض و النهايات اللي أتأملها و لما كبر عزهم و شهرهم و ساعدهم بكل ما عنده و عالج أبوه من السرطان و ساعد أمه بمرضها 

هالانسان وفي و بار بشكل يخليني أقول سبحان الله كيف ان الوفاء ما يعتمد على جنسية بل هو معدن وأصل الانسان صح أهله تخلوا عنه لكن أكيد هذي بذره فيه ممكن مو أمه و لا أبوه ممكن أجداده كانوا طيبين و هالعائلة نمّت هالبذرة..

و من ضمن الأشياء اللي قالوها خواته لأول مره (مراعاة لمشاعره) انه دايماً كان يستفرغ و خشمه يرعف يومياً و الأخت الرابعة كانت تقول انه دايماً ينام بحضنها، و كان يحكون كيف أول مره شافوه و هالشي صدق حسيته أثر فيه كثيير مو شوي خصوصاً انهم أول مره يقولونها له، وااه صدق الحياة غريبة و حلوة و عجيبة كيف صارت هالقصة هذي ووشلون آلت الأمور لكذا صدق قصته تخليني أقول الحياة حلوة و جميلة ومثل ما قال نبينا اللهم صل و سلم عليه ان الدنيا حلوة خضرة، قصته رغم آلامها و حزنها لكنها جميلة و دافية و حنونه..

و اللي تعلمته من هالانسان ان ما في شي مستحيل مافي شي اسمه الطرق مسدودة تخلوا عنه أهله عوضه ربي بأم و عايلة تجنن حتى اسمه سموه باسم يدل على انه محور الكون و نجم هههههههههههه مهتمين بأدق التفاصيل و فعلاً عطاهم ربي ظنهم و صار نجم و محور أساسي بعالم الكيبوب، تخلت عنه شركته الsm و حاربته و منعته من الاعلام الكوري لأكثر من 16 سنه لكن وش سوا؟ راح لليابان و اشتهر هناك بشكل كبير.. جاي جونغ علمني ان الحياة دايماً حتعطيني حلول المهم وش أسوي ؟ أبادر و أسعى و أساعد نفسي و أشوف الحل و أقرر أسويه ما يحتاج أعيش دور الضحية و الدرما..

صدق أحس ان ربي خلا معاه ملاك حارس من صغره ماشاء الله! أو انه هو انسان متفائل و دايماً يقلب القصة لأفضل سيناريو يحبه!

علمني جاي جونغ ان الحياة داااايماً بيكون فيها حضن دافي بيستقبلني، دايماً حيكون فيه باب يقفل بوجه الكل و يتشرع قدامي.. ليش ؟ لأن ربي ما يظلم أحد ما يعطي مشكله الا و معاها حل، ما يعطي ألم الا و معاه أمل، ما يعطي حزن الا وفي طياته فرح، ما يعطي عسر الا و مقرون معاه اليسر.. سبحانه لا اله الا هو، سبحان اللي خلاني أشوف قصة انسان عاش حياة أسوأ من حياتي بكثير لكنه نجى و هو الآن يعيش الحياة اللي يحلم فيها ..

أتمنى من كل قلبي جاي جونغ و عايلته الغنية بالبنات انه يعيش حياة طيبة كريمة مع أهله و ينجب أفضل الأطفال و يوفقه بالزوجة الصالحة..مدري وش فيني تحولت أم ههههههههههههه بس صدق هذي أمنياتي القلبية له 💗

رابط المقابلة:

https://youtu.be/IrQOc_rmfPI?si=PqcuYE_sGfy0vrt3