متلازمة جوسكا - البداية

أهلاً أصدقائي الجوسكايين

السلام عليكم ورحمة الله و بركاته

أكتب لكم هذي المدونة لنفسي أولاً ثم لكم، هذا اليوم هو اليوم اللي قررت فيه أكتب عن نفسي و حالتي اللي لازمتني من 13 سنة و بكل مره بأحكي عن تفاصيل أكثر..

اليوم مميز بالنسبة لي لأن الليلة هذي هي ليلة أول يوم برمضان 1446 هجري الله يجعلنا من صوامه و قوامه يارب..

وش كانت البداية؟

ممم ما أدري شلون بدت بالضبط لكن بحكي كل شي عندي..

و أنا صغيرة كنت أشوف أبوي دايم يحكي مع نفسه و يتكلم و كنت أضحك عليه لأن كان منغمس جداً في خياله مدري مرات أقول اللي فيني من الشماته؟ هههههههههههههههههههه و مرات أقول يمكن وراثة؟

العجيب انه حتى أمي نفس الشي لكن هالشي يخيفها و لما كنا صغار كانت تبكي تقول فيه أفكار تجي براسي غصباً عني ما تدري يا عيني انها متلازمه ><

بدأت المتلازمة عندي بشكل خفيف لما كنت أتخيل مواقف مضحكه مع بنات أنا معجبة فيهم و أبغى أكون جزء منهم لكنهم أكبر مني لذلك كنت أستحي منهم لذلك اكتفيت بالخيال هذا لما كنت بالمتوسط و الصدق ان دراستي ما كانت زي باقي البنات فأنا جتني صدمة و حالة نفسية و فصلت من المدرسة لمدة سنة أتوقع من بعدها تقربعت الدنيا عندي ههههههههههه

ما علينا البداية الفعلية لهذي الخيالات كان بعام 2012 لما كنت بأول ثانوي وقتها فصلت للمرة الثانية من المدرسة 

و هنا بدأت النكسة الحقيقية صارت الخيالات هذي جزء من يومي لعدة أسباب كانت فترة صعبة كثير في حياتي الشي الثاني خالتي قالت لي انها نحفت لما صارت تتخيل نفسها تمشي في مكان و نظرات الاعجاب عليها و هي بشكل جميل 

فقلت ليش ما أعتمدها؟

طبعاً أنا ضفت بهارات من عندي صرت أتخيل ان المشهور اللي أنا معجبة فيه مبهور فيني هههههههههههه و لأني من مجتمع محافظ جداً كنت أتخيل تصير لي كارثة حتى يشوفني أو يحبني هذاك المشهور.. طبعاً المشهور هذا بالكاد اللحين أتذكر ملامحه و أنا اللي قضيت سنين أتخيل نفسي بعيونه!

و من هنا بدأت سلسلة المعاناة حرفياً بسبب هالخيالات حياتي راحت سدى!

أنا الآن على مشارف الثلاثين وومكن لما تقرأ هالمقالة أكون تجاوزت هالسن، و يا للأسف اني بدون وظيفة بدون زوج و لا أطفال بدون تحقيق للذات و السبب هالخيالات اللي تسيطر علي من فترة لفترة صح اني عالجت جزء منها لكن قررت اني أسوي هالمدونة و أكتب كل اللي بخاطري لعله يكون العلاج الفعلي لعلّتي