فضفضة
مالكم بالطويلة.. قاعدة أفكر هل البقعة الجغرافية اللي أنا فيها هي السبب؟ أكيد هي سبب بس هل هي السبب الأكبر و اللي لو غيرته بيتغير كل شي و لا وهو طبع فيني؟ تجيني هالتساؤلات لأن ما قد جربت أطلع منها ههههههههههههه
لكن بمخي أنا رحت كل مكان و سافرت لكل مكان، أنا رحت كوريا و روسيا و الصين و تمشيت بلندن، أنا صرت شجاعة و ضعيفة و قوية و جميلة و عادية و محبوبة و مرفوضة و سعيدة جداً و حزينة جداً و كل هذا بخيالي!
مرات أفكر هل لو كنت بالبيت الجميل اللي أتمناه زي بيوت مشاهير السناب شات هل بعيش حياتي؟ و هل بمضي بحياتي؟ و هل بنجح و أكون الأفضل؟ هل راح تنتهي خيالاتي اذا تغير هالبيت القبيح اللي أتفشل منه؟
هل مخي راح يهدأ لما أبوي يأمن لنا بيت باسم أمي بدل تهديد أعمامي انهم بياخذون ورث أبوي بسم الله عليه و الله يطول بعمره على طاعته ؟
أفكار عشوائية تجي كثير براسي بس مالها جواب أبداً..
أفكر لو عشت الحياة اللي أبيها هل برضو راح تكون عندي هالمتلازمة أو لا؟
هل راح أكثر من أحلام اليقظة؟ هل بكون واو بحياتي الواقعية و بالتالي راح أستغني عن أفكاري و خيالاتي اللي ما أنزل الله بها من سلطان؟
أفكار كثير و أشياء كثير تدور في خلدي تخليني أتساءل دائماً..
بس تدرون بقول لكم على شي قررت رمضان هذا أتخلى عن كل شي عن أمنياتي، أهدافي، و كل شي و بقرأ سورة البقرة بدون أي شي ثاني بقراها بس عشان أبي من ربي يلهمني و يفتح لي باب رزق واسع يرزقني برزق من عنده، رزق حلال واسع ما أفكر فيه و لا أشيل همه و بإذن الله راح أرجع أكتب آخر الشهر هذا بيكون التزامي هالشهر و اللي بركز عليه 💞
تعليقات
إرسال تعليق
شاركني أفكارك