الله لا يوفق حقين التنمية الذاتيه

 

اييي زي ما قريتوا الله لا يوفقهم و حسبي الله و نعم الوكيل فيهم و أتمنى نفيهم من جزيرة العرب 😡

بقول لكم قصتي معاهم.. أنا من عمر 12 سنة تعرفت عليهم بشكل أعمق ليش؟ تذكرون لما قلت لكم اني فصلت و دخلت بحالة نفسية؟ اي بالضبط هذاك الوقت أهداني عمي كتاب لا تحزن و حبيته الصراحة و كان سبب في تجاوز اللي أنا فيه لكن بعدها اهتميت بهالكتب بشكل كبير جداً و أنا بعد كنت أحب لغة الجد من عمر صغير جداً فهالكتب كانت تثير فضولي و تعطيني تحفيز وهمي و كأني مدركة الناس و عارفتهم و بنفس الوقت أبي أبهرهم..

المهم انهم طيحوني بشي كبير و تافه و كان واحد ما ابي أذكر اسمه بس أول حرف منه صلاح الراشد 😒 المهم خلينا نسميه صوصو 

صوصو هذا كان يطلع على قناة اسمها الفراشة على ما أظن قناة مملة مرررره الشي الوحيد الممتع هو كلام الشخص اللي يحطونه طول الوقت المهم ان صوصو هذا هو اللي دخلني عالم التنويم المغناطيسي او الثيتا و كنت وقتها بالمتوسط أو بالثانوي ما أذكر المهم اني خفت ذيك المره لأنها أول مره أسوي فيها شي كذا بس بعدها كان شي مرييح ممكن لأنه شي جديد و مثير بالنسبة لي لكنه صدق وداني بداهية..

ليش؟ لأن صار هذا أسلوب حياة عندي كل شي أبيه لازم أتخيله بالبداية بس هل الحياة تمشي كذا؟ طبعاً لا 

صرت أعتمد على خيالي أكثر من اعتمادي على مشيئة الله و كأن خيالي هو الأساس و هو اللي بسوي فيه المعجزات لكنه مجرد شي وهمي غير موجود، شي ما يتحقق إذا ما فيه داعم بالخارج و بالحياة الواقعية و كطفلة مراهقة كنت أتمنى شي بسيط لكن كبير و بعيد بالنسبة لي زي البيت المستقل لكن مهما تخيلت و مهما دعيت ما جاء و ليومكم هذا بصير ثلاثينية و أنا طلعت من هالبيت هههههههههههههههههههههههه و بسبب فكرتي عن الخيال و انه يحقق المعجزات أسأت الأدب حتى مع الله يارب سامحني و علاقتي بربي جداً صاررت سيئة صارت علاقتي بالله فقط تبادل مصالح عطني اللي بخيالي و لا ترى ما راح أعبدك من قلبي 😢

لكن لكن لكنننن أخيراً اكتشفت طريقي و ألهمني ربي ان الخيال مو كل شي انما اني أعيش حاضري و أعبده و أسعى هذا الصح أما اني أحط رجل على رجل و أتخيل و أتوقع بيجيني شي هذا ضرب من الجنون!

طبعاً هم بيقولون لكم لا لازم سعي مع الخيال 

حبايبي.. أكلمكم عن تجررربه لا تدخلون أنفسكم لهالفخ الكبير اللي بياخذ منكم سنوات من محاولة الخروج من هذا المستنقع اللي بداخل هالفخ، لا تتخيلووون اسعوا الخيال ما يجذب شي الخال يخليكم عاجزين فقط و هو أنتوا أصلاً ما تخيلتو الا انكم عاجزين 

حقيقة مرّة أدري 

لكن هذا الصدق عجزكم هو اللي يخليكم تتخيلون، بدل ما تجربون شي ثاني و طريق ثاني لا تخدعون أنفسكم و تتخيلون أرض خضراء و مكان هادي و شهيق و نهيق طيب و بعدين؟ هل هذي حياة؟ هل هذا هو الشي اللي تبيه؟ و الأهم من هذا كله لو شفت  طفلك كذا هل بتدعمه أو بتنصحه؟ هنا بتعرف الجواب الصح و بتعرف وش المفيد لك و المناسب و اللي المفروض تمشي عليه..

الخلاصه

ما فيه شي اسمه جذب بالخيال أو أتخيل الشي قبل يجي، تبون تكملون أو تجربون براحتكم لكني أنا كناجية من هالفكرة المدمرة ما راح أرجع لها حتى لو لمعوها لي و غيروها و طوروها (بحر الزيف ما راح أطيح فيه مرة ثانية)

و سلامتكم و الله 😘