سوالف ما تنقال

 

السلام عليكم..

اليوم صار معي شي غريب غريييييب وربي أغرب شي صار لي و أنا بين الصحو  والمنام تخيلت اني دخلت بمكان كله نور و كأن ربي ألهمني هالشي يعني مو بإرادتي المهم اني شفت كأني أقول يارب يدخل نورك لمناطق بعقلي مهجورة و مجهولة واذا أدركتها بتتغير حياتي للأفضل بعدها تخيلت عقلي كللله نووور و أنا صرت كل نور أبيض بعدها طلعت من هالمكان طبعاً المكان كأنه كهف أو حاجة زي كذا و فيه بوابة المهم انفتحت البوابة و طلعت و رجعت لجسمي الحقيقي و أنا نايمة و صار عادي لكن عقلي متنور كللله و فيه نور لين ما صار هالنور جزء مني و بعدها غطيت في نوم عميق..

تدرون وش الغريب بالموضوع؟ اني لما قمت جاني تساؤل لأول مره بحياتي يخطر ببالي!

قلت لنفسي وش بيكون شكل حاضري لو كل مخاوفي المستقبلية كانت العكس، يعني خوفي ان حياتي تكون سيئة و اني أمرض مثلاً أتخيل ان هالخوف مو موجود و ان حياتي بتكون أفضل و جسمي بيكون أصح صحة أوصل لها، وربي كمية الراحة اللي جتني غريييبة قلت لنفسي طيب رمضان هذا لو انمحت كل مخاوفي المستقبلية كيف راح يكون شكله؟ 

صدق حسيت براحة عظيمة و انه كل دعواتي بتكون بلا توتر و بتكون بيقين عااالي..

خليني أقول لكم اني من أحد أسباب خيالاتي و اني عايشه فيها هو خوفي من المستقبل فحسيت انه واااو كيف ربي كذا ألهمني!

فالحمدلله دائماً و أبداً..

تدرون بعد وش قراراتي لسنة 2025 ؟ أبطل أسمع قصص الجرايم لأنها بالنسبة لي متعة عقلية و كأني محققة أكشف خيوط القضية لكنها مؤلمة و متعبة نفسياً لي و مرات أعيش بهواجيس و خوف بسببها و بعدين أقول ترى صارت بأمريكا وينك و وين هالمجرمين و الصدق بعد كل القصص اللي سمعتها مستحيل أروح أمريكا ههههههههههههههههههه

وكمان متلازمة جوسكا تغذيها التحليلات و العقل المحلل لذلك الصدق أفضّل اني أبتعد عن هالشي و أبطل تحليل لأن لاحظت ان التحليل يخليك تفكرين بأشياء مالها داعي و تضخمينها بعقلك لذلك التحليل جزء من انه يخلي هالمتلازمة للآن موجودة عندي لذلك بحاول أبسط تفكيري و أبسط حياتي و أفكر بطريقة سهلة و سلسة و بسيطة، كنت أحس الناس ذولا أغبياء قبل وانه سهل ينلعب عليهم بس اللحين أحس عندهم وجهة نظر و ان تبسيط الحياة براسي يخلي حياتي سهلة مو معناه انه يخليني مغفلة، و بعدين فيه مثل يقول (لا يغني حذر من قدر) لذلك حتى لو كان الشخص أذكى الأذكياء وقت القدر لو أيش ما سوى مستحيل يفلت منه..

و بعدين اذا فكرت بطريقة سهله ما يعني اني بكون ساذجة و ألقي بنفسي للتهلكة انما الدعاء و الأذكار و اني ما أروح لأماكن مشبوهة و ناس أحس تجاههم بعدم الراحة و خلاص، لأن دايماً ربي يسخر لي الناس الطيبة و الحمدلله ان ربي دايماً يوريني هالشي وينقذني دايماً يمكن بسبب طيب أجدادي و دعاؤهم لي و دعاء أمي و طيبتها مع الناس ما أعرف لكن الحمدلله على كل حال..

يارب اجعلني من اللي تُفرج عليهم و أعيش الحياة الرضية و المريحة و اللي أعيش فيها براحة مع أهلي و حبايبي يارب بكل يسر وسهولة و حب و أمان 💖