وش هي مسؤولياتي؟ -جلسة مصارحة مع الذات-
يااا هلا
اليوم قعدت أفكر انه اذا كان الخيال متعتي فأنا أقدر أختار متعة أشوف منها نتيجة تسعدني و تبسطني و تحمسني للحياة، و هذي هي مسؤوليتي تجاه نفسي؟
لذلك بسأل هل أنا مسؤولة؟
نعم ولكن بافراط حتى مرات بالمشاعر حتى لو ما سويت شي و ذلك بسبب الاضطراب اللي سببته لي طفولتي ناحية المسؤولية لدرجة أتحمل مسؤولية و قصة شخص ماهي لي و مرات أتكلم بصوتهم نيابةً عنهم لذلك أحس ان هذي مو مسؤولية هذي جحيم دنيوي.
هل أنا ملتزمة تجاه نفسي؟
الصراحة لا، عندي أشياء كثير تجاه نفسي و جسدي بالذات لكن مهملتها و أنا أساساً مجروحة منها و شايلة همها زي مثلاً الرياضة اللي أتهرب منها و بكل مره أتضايق اني ما سويتها، عنايتي بجسمي اللي بكل مره أؤجلها و أشتري كورس نفسي أو فكري أو كورس يعلمني مهارة لكني ما زلت غير سعيدة و ما زلت ما أقدر أتقدم لأني عالقة في موضوع الصحة و الجمال و أحسه كتلة معقدة بحياتي وفيها الكثير لذلك أخدع نفسي بكل مره و أتجاهلها و سبحان الله كأني أبعد المال عني اذا نويت أسوي شي تجميلي مثل الليزر مثلاً اذا نويت أسويه يطلع لي مرض أو التزام أو أنشغل لذلك يس أنا مو قاعدة أتطور بالشكل الكافي لأن أهم شي عندي و اللي لو اهتميت فيه فعلاً راح يتغير كل شي أنا مو ملتزمة تجاهه، هل أنا ملتزمة تجاه شغلي؟ أحسه عبء علي و أحشر الشغل باليوم اللي عندي فيه شغف بس هل هذا ينفع ؟ طبعاً لا لذلك أنا أصارح نفسي اني مو ملتزمة تجاه مسؤولياتي الحقيقية، فعلياً كأني أصلي السنة و أتترك الفرض أصوم الاثنين و الخميس و أترك صيام رمضان!
أهتم بالشي اللي ما هو مطلوب مني و أتجاهل تماماً الشي الواجب اني أسويه ثم عشان أرضى عن نفسي أسوي الشي غير المهم لكنه مخدر مؤقت و بعدها أرجع لنفس الحالة اللي خلتني أسوي هالشي بالمقام الأول و هكذا دواليك...
هل سبق و سويت شي أنا ما اخترته؟
ايييي لما صديقتي تقول اطلعي معاي و أطلع مكرهه لكن أرجع و أنا مبسوطة و أحس انه ما يستاهل كل هالضيقة
و لما جتني وحدة تبي تطلب خدمة و أنا ما أعرفها دقيت الصدر و تعبت الصدق لكن في شخص سواها لي و عطيته المبلغ كامل لأني مستحية أقول له يعطيني النص بالنص و منجد أخذها للحين مقهوووره هههههههههههههههه
و كمان لما أهلي يطلبوني أسوي لهم الخدمات الحكومية الالكترونية
هل عندي أدوات هالطلبات هذي و كم نسبة اجادتي لها؟
كلها الصراحة متوفرة أدواتها و نسبة اجادتي لها كبيرة لكن الثانية لا حسيتني نكبت نفسي لكن تعلمت شي جديد..
نسبة اجادتي:
الأولى:75%
الثانية:45%
الثالثة:100%
كلها كنت أتوقع اني بفشل فيها و بحزن لكن الوحيدة اللي فشلت فيها فعلاً الثانية وفعلاً توقعاتي ما تتطابق مع الحقيقة و هذا شي يزعل بس متأكدة لأني خايفة أغتر بنفسي و أنخذل لكن المشكلة ان هالشي يؤذيني منجد و يستنزف طاقتي لأني أخاف اذا ما خفت تكون توقعاتي عالية مره و على قدر التوقعات العالية يجي الخذلان، فالصدق أغبط الناس اللي تعرف توازن هالشي وما تحتقر ذاتها و تسيء الظن بالله ثم نفسها و تخذل نفسها قبل ما تبدأ أصلاً بسبب هالمشاعر و التفكير الطايح..
وش هي مسؤولياتي أصلاً؟
مسؤولياتي العائلية اني أدعمهم و أحبهم و أغلبها شعورية، يعني 50% شعور 30% فكر 20% مادي
بالنسبة لمسؤوليات العمل فأنا أسعى و هو الجزء اللي أسعى فيه مادياً بالغالب لكن الفكر يغلبه، بمعنى فكري 60% مادي 35% شعور 5%
واو! أحس مرررره غريب ههههههههههههههههههههه
تدرون ليه؟ لأن بكل الاثنين أنا ملخبطة الدنيا، مسؤلياتي العائلية مو راضية عليها و أبيها دايماً تكون مادية لكن قس واااات؟ ان أقل شي عندي تجاههم هو المسؤولية المادية و نفس الشي للعمل !
أتوقع ان عندي خلل تجاه المسؤولية المادية و مو غريب لأني عايشة في اللالاند هههههههههههههههههههههههههههههه
هل أنا متسقة مع دوري؟
اي الصراحة اذا انتهت مسؤوليتي أوقف و أبدأ شي جديد خصوصاً آخر السنوات لكن بشعورغير جيد
اكتشفت أشياء كثير عن ذاتي اليوم، شكراً لنفسي الجميلة على الجلسة الحلوة هذي 😘💋
تعليقات
إرسال تعليق
شاركني أفكارك