رمضان ريكونكت - د.سمية الناصر

لي 5 أيام أسمع قصص د. سمية الناصر في دورة رمضان ريكونكت مدري ليه قلت بشتريها مع اني أحس اني مكتفية من الدورات لكن اشتريتها و حبيتها كثييرر..

فكرتها انها كل يوم تجيب قصة و تعطيك الحكم المستخرجة من كل قصة و بعضها تعطيك تمارين، كل قصة الحكمة اللي فيها تفتح لي مدارك كبيرة جداً، الصدق اني كنت بكتب عن الدورة بعد ما تنتهي كل القصص لكن قصة اليوم الخامس الحكمة اللي فيها لامستني و تزامنت مع كلامي في التدوينة اللي قبل و كأنها جواب لي و الصدق سمعتها أكثررر من مره، ذكرت لكم اني شفت كلام اليابانيين والكوريين عن الاسلام المسيء طبعاً و قعدت أبني حوارات بمخي ليوم كامل و جيت كتبت عنها..

في قصة اليوم الخامس ذكرت الدكتورة قصة جميلة و أضافت حكمة رائعة خلتني أفكر قالت غالباً الناس عندهم حل لمشكلاتهم لكنهم دايماً يختارون الأصعب و قالت لو كنت في مكان و في أحد سب دينك أو دولتك أو شي يخصك حله التجاهل ! و ربي حسيتها رسالة لي 

لأن فعلاً هذولا ناس من ورى معرفات مجهولة و هم بكبرهم مجهولين ليش أعطي لرأيهم الغاضب أو كلامهم اللي عاري من الصحة و طريقتهم بالكلام و تعاليهم أهمية؟

ليش أصلاً أضيع يوم كااااااااااامل في الحوارات بمخي عشان شي زي كذا؟

الله يطيح حظهم بس هههههههههههههههههههههه

لذلك صدقاً اليوم تجاهلت كل كلام مسيء عن الاسلام أو المرأة أو دولتي بالعكس صرت أتجاهل و الصدق الشعور مريح، و على قولة المثل طنش الحمير تعيش أمير هههههههههههههههه وربي هالمقولة مريحة و صحيحة مهما بدا فيها من تعالي لكن ذولا اللي يسيؤون لك يشوفونك بهالطريقة لذلك جفف منابعهم و لا تعطيهم على جوهم..

التحاور العقلي المستمر أو متلازمة جوسكا أعتقد سببها كمان هو عدم التجاهل اني ما أتغاضى عن أي شيء و أفكر بكل شيء بالعكس أحلل و أفكر بطريقة للحل، لكن الحل سهل .. ببساطة أتجااااااااااهل !

التجاهل مريح و هو حل من الحلول العظيمة أكيد للأشياء و الأشخاص اللي مالهم حل، و الأكيد لو اني متمسكة بشيء يؤذيني برخي يدي فترة و أسأل نفسي لييييييييييه! 

و أنا قاعدة أكتب طرى علي شيء! تذكرت و أنا بعمر الطفولة كانت بنت خالتي تحب الجدال و كنا مختلفين أنا و اياها و كانت هي تتجادل مع الكل و يمدحوني لأني الصدق ما أفكر أكون ضد أحد أو أتجادل معاه و كانوا يحاربونها و مرات يحاربونها فيني من غير ما يكون لي دخل أنا لكن بما اننا بنفس العمر لذلك يقولون خليك زي فلانه و هي كطفلة أكيد ما راح تحب هالشي و كانت نقاشاتنا أغلبها تافهة و مرات عن الدين، لا والله كثير عن الدين لأن خالاتي مطوعات هههههههههههههه فهي تبي تخالفهم أو لها رأيها الخاص و لكن تبي تفرضه و كنت أنا الصدق زي خالاتي و أمي، أنا من الناس اللي مع الجماعة الصدق ما عندي مشكلة أكون زيهم بس في أشياء أسلك لهم فيها و أخالفها عادي لأن هم مو ربي بس بنت خالتي هذي كانت واضحة و تناقش، فكانت تناقشني كثير و كأني المثال اللي حطوه خالاتي لها ممممممم زي أيش كأني خدمة العملاء اللي العميل يزعل من الشركة و يشرشح موظف خدمة العملاء بالضبط أنا كنت موظف خدمة العملاء ههههههههههههههههههههه

فكانت نقاشاتنا كثير و كانت تبي تفرض رأيها دايماً لين ما فيوم من الأيام استسلمت، مدري ليه و كيف و متى لكني صدقاً مليت لأن هذي مو أنا و لا هذا جوي الصدق أبي علاقة هادية و مريحة، أذكر شافتني أقرأ سورة الكهف بيوم الجمعة قالت لي ترى حديث ضعيف ان الكهف تنقرى بيوم الجمعة قلت امممم مدري و الله و انتهى النقاش و ارتحت وربي ههههههههههههههه!

لكن بطريقةٍ ما هالشي أثر علي صرت ما أبي أجادل لكن الحوارات صارت داخلية!

صرت أسولف مع نفسي أغلب الوقت و حتى حواراتي الداخلية أنا الطرف الأوعى اللي يدير الحوار و يمسكه و اللي يحرج اللي قدامه 

بس هل أنا كذاا؟ هل ملزومة أكون كذا؟ و لو كنت كذا هل فعلاً الناس بيعجبون فيني؟ أو بيقولون تسوي نفسها مثالية أو انها متكبرة و شايفة نفسها فاهمة أو ضعيفة شخصية مالها رأي؟ الناس تختلف بفهمها للناس فليش أتعب نفسي بالتفكير عنهم ؟ و هم مليارات و عندهم حياتهم و أفكارهم و معتقداتهم الخاصة..

سمية الناصر بكبرها على انها مفكرة و واعية وصدق ساعدت بنات كثيييير و شباب كمان انهم يطلعون من اللي هم فيه و أنا منهم، لكن يهاجمونها كثير و يستحقرونها و يسبونها و يطقطقون عليها، العجيب اني كنت وحدة منهم هههههههههه لكن بعد ما دخلت باكتئاب و مرت فترة طويلة على شعوري السيء لقيت سمية الناصر أخذت بيديني بيدها الدافية و وصلتني للطريق بتوفيق الله و مو بس سمية كانت السبب لا ناس كانوا الناس يسبونهم لكنهم فادوني الصدق لدرجة أحسني الآن شكلت آرائي و شخصيتي الخاصة بعد ما محيتها عشان أسباب كثير أولها الناس، صدق سمية الناصر ياااا حظها بأجري الله يجعله بموازين حسناتها يارب كانت مثل الفانوس اللي نور حياتي و حياة أهلي كمان..

أشياء كثير و أفكار كثير تغيرت من 5 سنوات الحمدلله و أنا مووو أنا بفضل الله الحمدلله و أدري انه الدعاء اللي دعيته بهذيك الليلة المظلمة استجابه ربي سبحانه لي وحده..

يارب أستغفرك و أتوب اليك من كل ظن سيء ظنيته فيك و بكل مره أسأت الأدب معاك، أنت الرحمن الرحيم الغفور و ياربياني أشهدك اني تبت اليك و يارب اغفر لي و ارحمني و اجبرني و عافني و اعف عني و ارضني و ارض عني يااارب العالمين.