مدري ما صرت أعرف..

 أمس قلت ان الخيالات و الحوارات انخفضت أهميتها عندي لكن اليوم وبطريقةٍ ما رجعت لي بشكل كبير يمكن لأني شفت موضوع مثير للاهتمام اللي هو ياباني مسلم و بعدها شفت فيديوهات باللغة اليابانية و الكورية عن المسلمين و لقيت سب الصراحة منهم و تعالي و كأنهم منزهين و يرمون بلاهم على غيرهم، ما أقول ان المسلمين هم الأفضل أو الكوريين و اليابانيين هم الأسواء، اللي أقوله انهم يقولون صفات انسانية شريرة و يلصقونها بالمسلمين بينما هي موجودة بكل البشر..

و يشوفون الاسلام تخلف و معتمد على بقع جغرافية معينة، هم ناس محدودة الفكر الصدق بشكل كبير جداً يحبون الملذات و المتع الجسدية بشكل كبير لذلك الدين يشوفونه تهديد لهم و شيء سيء، كل هذا وش علاقته فيني؟ اني صرت أتخيل و أتحاور بشكل كبير حوار يرضيني مع اني رديت على تعليقاتهم و لكن ليش للحين يشتغل بالخلفية عندي؟ هههههههههههههههه التطبيقات اللي تشتغل بالخلفية و تتركها مفتوحة تسحب من طاقة الشحن كذا الموضوع بالنسبة للانسان اذا لت و عجن بموضوع لفترة اطول مما ينبغي ينتهي الأمر فيه بالاستنزاف و انا عندي أعمال أسويها لكن بسبب هالشي قاعدة أفكر .. يعني كماااان خلاص وقفي يعني كلام من ناس ما تعرفينهم بيوزرات و محركات مجهولة و غير معروفة يخلوني أفكر ليوم كامل؟

أحس ربي بيسألني عن عمري هذا ووقتي ووين أفنيته، متفشلة صدق لما أقول لربي اني حتى ما سعيت بس جالسة و أتخيل هههههههههههههههههه  صدق شي مذهل و غريب اني أقضي الساعات أفكر بحوار أكون الفايزة فيه، انو طيب و بعدين؟؟ شفيتِ غليلك و أفحمتيهم؟ لا أبهرتيهم؟ برضو لا .. أصلاً ما الفروض اني أفكر بهالطريقة من الأساس؟ لأنهم بشر المهم اني أطنش يعني ما أسمع اللي حولي يسبون الكوريين و اليابانيين؟ أمي دايماً تقول لي و هم صغار ان الكوريين آكلين الكلاب و أنا أقول لها لا تقوول اسكتي بس شايفتهم بعيني هههههههههههههه و حتى أهالينا الكبار كذا يقولون عنهم بس هل كوريا كذا الآن ؟ ممكن ما أعرف بس اللي أشوفه منهم لا بالعكس الكلب عندهم زي البشر اللحين، بس هل أهلي بيقتنعون بالعكس؟ لا طبعاً و مو لازم يغيرون من النظرة هذي

 و اليابانيين نفس الشي بالنسبة لانحرافاتهم الفكرية العالية مجتمعهم غريب و شفت لقاءات خلتني أتعجب من بنات صغار يتكلمون بكلام صدق ما ينقال كطفلة و هذي النظرة كونتها بنفسي و الصدق انصدمت بس هل كل اليابانيين كذا؟ لا 

هل راح أغير قناعاتي عنهم أحس للوقت الحالي ما عندي نية لدرجة اني اشمأزيت من لغتهم و ا صرت أحبها يوم دريت ان هذي علومهم، بس هو بالنسبة لهم عادي بالعكس شي حلو و يشوفوني ممكن مثيرة للشفقة لأني مو زهم بينما أنا أشوفهم بهالنظرة هههههههههههههههههههههه يضحك صح؟

غريب كيف انه ربي خلقنا مختلفين لهالدرجة و أكيد له حكمة، بس بما اني ما أعرفهم و لا أتواصل مع أحد منهم، وش علي منهم؟ صدق أنا شعليه؟ المهم اني أستفيد منهم و أحترمهم مثلاً الكوريين أعبي وقتي الفاضي بمسلسلاتهم، اليابانيين أستفيد من منتجاتهم، ليش أخلق حوارات مع ناس ما راح ألتقي فيهم و لا عندي اهتمام ألقتي فيهم أصلاً و ناس ما يعجبوني و لا يعجبني ستايل حياتهم و الطريقة اللي يعيشون فيها، هذولا الدولتين هم الأعلى بمعدلات الان ت حار هل لأن حياتهم سهلة؟ لا لأن حياتهم صعبة بما يكفي لذلك اللي فيهم مكفيهم و يعيشون مشاكلهم الخاصة في هذيك البقعة البعيدة عني جداً بينما أنا في الاتجاه المعاكس لهم تماماً ههههههههههههه!!

فليه أهتم أصلاً بخلق حوارات مع أشخاص غير مهتمه لهم؟ أخلق حوار مع مشاهيرهم اللي يجذبوني و اللي أحس عندهم انفتاح فكري و ما راح يحرجوني واو هههههههههههههههههههههههه! 

عرفت اللحين ان الموضوع مو كوريا و اليابان لكنه نمط بالتفكير متكرر عندي ألا وهو اني أتخيل حوارات مع ناس تتفهمني لأاني أبي أثبت نفسي و لأني ما انعطييت مساحة كافية قبل ان أحدد يسمعني بالطريقة اللي أحبها، في كثير من الأحيان أُسيء فهمي خصوصاً من الرجال حولي لذلك و كأني أقنع عقلي اني مقبولة و مفهومه من الرجال و اني لطيفة و حبوبة و مرغوبة، لكن هل هالشي لازم؟ لا لكني أحب هذا الشي و أتمنى يحصل بحياتي ان أحد يسمع كلامي و يشوف لطافتي و يستشعرها و ينبهر فيني من غير ما يحكم أو يتحكم فيني..

أعتقد هذي رغباتي الخفية اللي أستحي أقولها لأحد و صعب اني أواجهها بنفسي، لكني اليوم أنا زي ما قلت لكم و السبب اللي خلاني أفتح هالمدونة اني أبي أساااعد نفسي و أحبها زي ما هي و هالكتابة سبب بعد الله بادراكي و كذلك تجاوزي للموضوع باذن الله